Востраў. Царква Раства Багародзіцы

На самым поўдні Пінскага раёна ёсць мястэчка Востраў, пасярод якога пабудавана праваслаўная царква Раства Багародзіцы. Царква пабудавана ў часы Вялікага Княства Літоўскага ў 1720 годзе і першапачаткова належыла ўніяцкім вернікам. У эпоху Расійскай імперыі ў 19 стагоддзі пасля забароны ўніі будынак перадалі праваслаўнай царкве. У 1891 годзе царкву перабудавалі. Перад храмам была ўсталявана драўляная трохярусная званіца, якая накрыта чатырохскатным дахам, які спачатку быў зроблены з гонта.

Царква з'яўляецца помнікам архітэктуры драўлянага народнага дойлідства. Будынак складаецца з трох асноўных частак: прытвор, малітоўная зала і апсіда. Невялікі прытвор прыбудаваны да галоўнага фасада, накрыты двухскатным дахам. Над асноўным аб'ёмам узвышаецца чатырохгранная вежа на якой васьмігранны барабан, завершаны невялікай цыбулінай. Асноўны аб'ём накрыты двухскатным дахам. Над алтарнай часткай таксама чатырохгранная вежа з невялікай цыбулінай. У бакавых сценах і ў апсідзе маюцца прамавугольныя вокны.

У інтэр'еры храма ёсць абраз 18 – 19 стагоддзя «Маці Божая Замілаванне». У апошнія гады царква адрэстаўравана. 

На мясцовых могілках ёсць драўляная капліца.