Олтуш. Капліца Святога Аляксея

Калі праехаць па трасе за Маларыту на поўдзень 15 кіламетраў да возера Олтуш, то вы патрапіце ў старажытнае мястэчка Олтуш. Тут ёсць два старых культавых будынка: капліца Святога Аляксея і праваслаўная Праабражэнская царква.  Упершыню ў гістарычных крыніцах мястэчка ўпамінаецца ў 16 стагоддзі. У 17 стагоддзі была драўляная ўніяцкая царква. У 1792 годзе апошні кароль Рэчы Паспалітай дае прывілей на пабудову царквы Праабражэння Гасподняга. Пасля трэцяга падзелу Рэчы Паспалітай у 1795 годзе імператрыца Кацярына ІІ перадала гэтае мястэчка генералу М. Ланскому. Па дакументам 1854 года ў Олтушы было каля ста драўляных жылых будынкаў, школа, карчма, валасное ўпраўленне і капліца з царквой.  Пасля Рыжскай дамовы ў 1921 годзе мястэчка ў складзе Польшчы да 1939 года.

 Да нашага часу на мясцовых могілках захавалася мураваная праваслаўная капліца, якую асвяцілі ў гонар Святога Аляксея.

Будынак быў узведзены ў 1872 годзе. Дагэтуль капліца на могілках была, худчэй за ўсё, драўляная. Капліца ўзведзена ў стылі класіцызму. Храм мае прамавугольнік у плане, які накрыты двухсхільным дахам. Над будынкам узвышаецца васьмігранны барабан з цыбулінай. Уваход аформлены ў выглядзе невысокага прытвора, які прыбудаваны да галоўнага фасада. Над фасадам трохвугольны франтон. Будынак узведзены з цэглы і атынкаваны. Дэкаратыўнае аздабленне грунтуецца на спалучэнні белых і шэрых архітэктурных дэталей. Капліца адрамантавана. Працуе, як правіла, па праваслаўным святам і ў памінальныя дні.