Новы Свержань. Успенская праваслаўная царква

Пасля таго, як мястэчка Новы Свержань набыў князь Радзівіл напрыканцы 16 стагоддзя, ён адразу тут фундаваў каталіцкі касцёл Пятра і Паўла і ўніяцкую царкву Успення Прасвятой Багародзіцы. Заснаваў царкву князь Радзівіл у 1590 годзе. Пазней пры ўніяцкай царкве быў заснаваны манастыр базыльянаў. Князь Міхаіл Казімір Радзівіл Рыбанька ахвяраваў базыльянам 74000 злотых у 1743 годзе. Пасля забароны ўніі ў 19 стагоддзі храм перайшоў да праваслаўнай царквы. У савецкія часы царква не працавала. Затым вернута праваслаўным вернікам і зараз у царкве праводзіцца рамонт. Успенская царква да гандлёвай плошчы павернута бакавым заходнім фасадам. У архітэктуры храма дамінуе высокая чатырохкутная вежа. Дэкор вежы і храма вельмі сціплы. Інтэр'ер храма зальнага тыпу. Маюцца хоры, якія падтрымліваюць 2 драўляныя калоны. Царква абнесена мураванай агароджай з бутавага камення. Каля царквы пабудавана ўваходная брама.