Навагрудак. Чыгуначны вакзал і аўтастанцыя

У старажытным горадзе Наваградку, які з'яўляецца першай сталіцай Вялікага Княства Літоўскага, ёсць вельмі шмат помнікаў архітэктуры і даўніны. Цікавымі аб'ектамі таксама з'яўляюцца і будынкі, якія ўзведзены ў часы Польскай дзяржавы 1921-1939 гадоў, калі Навагрудак з'яўляўся цэнтрам ваяводства.

У цэнтры горада па вуліцы Адама Міцкевіча знаходзіцца будынак аўтавакзала і будынак былога чыгуначнага вакзала. Вы будзеце здзіўлены, адкуль у горадзе чыгунка. А вось якая з гэтым будынкам звязаная цікавая гісторыя.

Падчас Першай сусветнай вайны, калі Заходняя Беларусь і Навагрудак апынуліся пад нямецкай акупацыяй, немцы ў 1916 годзе пабудавалі вузкакалейную чыгуначную дарогу на 70 кіламетраў ад станцыі Наваельня, якая вядзе ад лініі Баранавічы – Ліда. Дарогу праклалі праз Навагрудак да мястэчка Любча, што ў Навагрудскім раёне. Гэтую чыгунку немцы пабудавалі ў ваенных мэтах.

Пасля Рыжскага міру з 1921 года Навагрудак у складзе Польскай дзяржавы і становіцца горад цэнтрам ваяводства. У 1920-я гады будуецца з цэглы ў закапанскім стылі будынак чыгуначнага вакзала. Былі нават планы пашыраць кірунак чыгункі з Навагрудка аж да Ашмян.

Пасля Вялікай Айчыннай вайны чыгунку аднавілі і выкарыстоўвалі для перавозу пасажыраў і грузаў. З развіццём аўтамабільнага транспарту, Значэнне мясцовай чыгункі значна зменшылася, і выкарыстоўваць яе стала немэтазгодна. У 1965 годзе чыгунку дэмантавалі. А будынак чыгуначнага вакзала прыстасавалі пад аўтавакзал.