Навагрудак. Помнік Народнаму паэту Якубу Коласу

У горадзе Навагрудак на вуліцы Адама Міцкевіча знаходзіцца помнік народнаму паэту Беларусі Якубу Коласу (1882-1956). Помнік усталяваны каля будынка аўтавакзала.

Чаму менавіта тут паставілі помнік народнаму Песняру? Сапраўднае прозвішча Якуба Коласа - Міцкевіч Канстанцін Міхайлавіч. Таму і ўсталявалі помнік Міцкевічу на вуліцы Міцкевіча.

Якуб Колас не раз быў у горадзе Навагрудак. Першы раз народны паэт наведаў горад у 1940 годзе. Паэт прыехаў не адзін, а ў складзе рэспубліканскай камісіі, якая займалася арганізацыяй мерапрыемстваў па ўвекавечанні памяці Адама Міцкевіча, бо выконвалася 85 гадоў з дня смерці геніяльнага паэта-земляка.

Пасля Вялікай Айчыннай вайны Я. Колас не раз прыязджаў у Навагрудак, як паэт і ганаровы госць, бо ў тыя часы Я.Колас быў дэпутатам Вярхоўнага Савета БССР ад Навагрудскага раёна.

Мясцовыя краязнаўцы і школьнікі распрацавалі краязнаўчы турыстычны маршрут "Ад Міцкевіча да Міцкевіча", дзе наведваюць родныя мясціны Адама Міцкевіча, а затым месцы, звязаныя з жыццём і дзейнасцю Якуба Коласа.