Магілёў. Успенскія могілкі.

Па вуліцы Чалюскінцаў, былому Быхаўскаму тракту знаходзяцца самыя старадаўнія могілкі горада Магілёва. Заснаваныя былі ў 17 стагоддзі, а па некаторым звесткам яшчэ ў 16 стагоддзі, і называліся так у гонар Успенскай царквы, якая знаходзілася праз дарогу недалёка ад Дняпра і была знесена пасля вайны ў 1950-х гадах. У 1990-х гадах на Успенскіх могілках была выяўлена самая старая ў Магілёве надмагільная пліта з выявай герба, якая датуецца 16 – 17 стагоддзем і даследчыкі мяркуюць, што яна належала прадстаўніку шляхецкага роду Валовічаў. Большасць пахаванняў датуецца 19 – пачаткам 20 стагоддзя. З левага боку ад цэнтральнай алеі была пабудавана ў пачатку 20 стагоддзя радавая капліца - усыпальніца Кленцэ. Сярод захаваўшыхся пахаванняў вызначаецца некропаль вядомага дваранскага роду Гартынскіх. Вядомыя магілёўцы, што знайшлі свой апошні прытулак на Успенскіх могілках: браты Прасольныя, якія мелі ў Магілёве сваю фотамайстэрню; Мікалай Гартынскі – гісторык і краязнавец; губернскі пачтмейсцер Кузьма Карыцкі і многія іншыя. На цэнтральнай алеі могілак яшчэ захавалася старадаўняя брукаванка. Ёсць і некалькі векавых дрэваў.