Кунаса. Царква Дабравешчання Прасвятой Багародзіцы.

    У Нясвіжскім раёне ў мястэчку Кунаса пабудавана драўляная праваслаўная царква Дабравешчання Прасвятой Багародзіцы. Упершыню Кунаса ўпамінаецца ў гістарычных крыніцах у 16 стагоддзі. У гэты перыяд у эпоху Вялікага Княства Літоўскага мястэчка належыць магнатам Пацам, а потым Радзівілам.

           У 1730 годзе ўпамінаецца ў дакументах ўніяцкая драўляная Дабравешчанская царква. У 1815 годзе Радзівілы адрамантавалі прыхадскую Дабравешчанскую царкву. Была царкоўна–прыхадская школа. Да прыходу адносілася 13 бліжэйшых вёсак і было 2226 прыхаджан.

           У 1877 годзе старажытная царква была знішчана пажарам. У 1887 годзе пабудаваны новы храм.

            Царква ўзведзена на ўскрайку мястэчка ў стылі народнага драўлянага дойлідства з рысамі рэтраспектыўна–рускага стылю. Мае цэнтрычную крыжова – купальную канструкцыю. Складаецца з трох асноўных частак: прытвор, малітоўная зала і апсіда. Да малітоўнай залы прыбудаваны бакавыя прытворы. Над асноўным аб'ёмам узведзены васьмігранны светлавы барабан з 5 купаламі–цыбулінамі.

        У інтэр'еры ёсць двухярусны іканастас 19-га стагоддзя.