Косава. Царква Святога Антонія

Невялікі гарадок Косава Івацэвіцкага раёна вядомы сваімі шматлікімі помнікамі архітэктуры і музеямі. Каб усё аглядзець неабходна сюды прыехаць на цэлы дзень. У першую чаргу госці аглядаюць палац Пуслоўскіх і музей Тадэвуша Касцюшкі.

 У цэнтры мястэчка ёсць таксама некалькі культавых будынакаў. Сярод іх праваслаўная мураваная царква Святога Антонія 19 стагоддзя, якая знаходзіцца ў цэнтры мястэчка. Першая царква ў Косава была ўзведзена яшчэ ў часы Вялікага Княства Літоўскага ў 16 стагоддзі.

 Мураваная царква Святога Антонія пабудавана ў 1868 годзе на тым самым месцы, дзе быў папярэдні храм, які быў знішчаны пажарам. Новы храм быў пабудаваны па фундацыі роду Пуслоўскіх і пры дапамозе графа Мураў'ёва і мясцовых уладаў. Збіраліся таксама ахвяраванні і мясцовымі прыхаджанамі.

 Помнік узведзены па тыпавому праекту ў рэтраспектыўна–рускім стылі. Храм складаецца з кананічных асноўных чатырох частак: прытвор, трапезная, малітоўная зала і апсіда. Над прытворам узведзена шматярусная вежа–званіца. Над асноўным аб'ёмам узвышаецца васьмігранны барабан з купалам–цыбулінай.

Вакол царкоўнай тэрыторыі ўзведзена мураваная агароджа. Царква ў апошнія гады адрамантавана.