Бялавічы. Царква Святога Іллі.

У старажытным мястэчку Бялавічы Івацэвіцкага раёна ёсць драўляная праваслаўная царква. У часы Вялікага Княства Літоўскага ў 15 стагоддзі мястэчка належыла Юшку Гойцавічу.

 Потым гэта ўладанні Вялікага Князя Казіміра. Уваходзіла ў склад Слонімскага павета. Затым належыла Глінскаму, Чартарыйскаму, Тышкевічам, Сапегам і іншым гаспадарам.

У 1630 годзе была пабудавана Ільінская ўніяцкая царква. У 18 стагоддзі на яе месцы пасля пажару, пабудаваны новы храм. 

У савецкія часы пасля Вялікай Айчыннай вайны царква зачынена ў 1960 – я гады. Перададзена вернікам напрыканцы існавання Савецкага Саюза і пасля рамонта ў 1990 годзе святыню зноў асвяцілі.

Помнік узведзены ў традыцыях народнага драўлянага дойлiдства з элементамі барока і класіцызму. Складаецца будынак з двух асноўных частак: малітоўнай залы і апсіды. Над галоўным фасадам надбудавана чацверыковая вежа. У інтэр'еры маюцца хоры і драўляны двухярусны іканастас.

 Перад царквой у 1885 годзе была ўзведзена мураваная з бутавага камяня трохярусная брама–званіца. Масіўны ніжні ярус брамы прарэзаны шырокай праязной аркай.