Гошчава. Царква Узвіжэння Святога Крыжа

У мястэчку Гошчава Івацэвіцкага раёна ёсць праваслаўная царква Узвіжэння Святога Крыжа, якая пабудавана на мясцовых могілках. Першая царква тут была пабудавана яшчэ ў часы Вялікага Княства Літоўскага ў 16 стагоддзі па фундацыі Елізаветы Тышкевіч – Савіцкай. У 17 стагоддзі святыня была знішчана пажарам. У 1692 годзе Мікалай Тышкевіч фундаваў пабудову манастыра дамініканцаў, а таксама каталіцкі касцёл.

У часы Расійскай імперыі на месцы касцёла ў 1838 года была пабудавана царква ў гонар Узвіжэння Святога Крыжа. Храм некалькі разоў рамантаваўся і перабудоўваўся.

 Будынак складаецца з двух асноўных частак: малітоўнай залы і апсіды. Над прытворам надбудавана трохярусная вежа – званіца васьмярык над васьмерыком. Галоўны фасад па краям фланкіраваны чатырохграннымі вежамі. Асноўны аб'ём накрыты двухскатным дахам і вальмавы дах над апсідай. Над асноўным аб'ёмам васьмігранны светлавы барабан з купалам – цыбулінай. У інтэр'еры маюцца хоры. Малельная прастора зальнага тыпу. У храме маецца крыпта.

 У 2009 годзе царква была значна перабудавана па ініцыятыве мясцовага святара і храм страціў свае адметныя архітэктурныя рысы. І ў выніку апошняй перабудовы культавы будынак быў пазбаўлены статуса помніка архітэктуры.