Альба. Царква Святога Георгія.

У Івацэвіцкім раёне па шляху з Ружан на Івацэвічы знаходзіцца мястэчка Альба. У мястэчку на мясцовых могілках пабудавана праваслаўная драўляная царква Святога Георгія. Храм быў пабудаваны яшчэ ў часы Вялікага Княства Літоўскага ў 1692 годзе, або, па іншым звесткам, у 1790 годзе.

 Царква, худчэй за ўсё спачатку належыла ўніятам, а потым перайшла да праваслаўных у часы Расійскай імперыі. Святыня была ўзведзена на сродкі прыхаджан.

 У 1908 годзе дабудавана вежа – званіца і праведзены капітальны рамонт будынка. У часы Першай сусветнай вайны царква была пашкоджана і адбудавана ў міжваенны перыяд за часамі Польскай дзяржавы. Пасля Вялікай Айчыннай вайны ў 1964 годзе святыню зачынілі. Перадалі будынак вернікам толькі напрыканцы існавання Савецкага Саюза ў 1989 годзе. Быў праведзены рамонт і ў 1991 годзе царкву асвяціў епіскап Пінскі і Лунінецкі Стэфан.

 Будынак пабудаваны ў традыцыях драўлянага народнага дойлідства. Складаецца з трох асноўных частак: прытвор, малітоўная зала і апсіда. Над прытворам надбудавана шматярусная вежа – званіца, якая завершана шматграным шатром. Да прытвора прыбудаваны казырок на драўляных слупах. Вакол храма ўзведзена мураваная агароджа з камення.