Косава. Музей-сядзіба Тадэвуша Касцюшкі.

Імя Тадэвуша Касцюшкі вядома ва ўсім свеце. Ён нацыянальны герой не толькі Беларусі, але і Польшчы, ЗША, ганаровы грамадзянін Францыі.

Нарадзіўся знакаміты ваенны і палітычны дзеяч у невялікім фальварку Мерачоўшчына побач з Косавам. І менавіта тут ён правёў свае першыя 9 год жыцця.

Адукацыю Тадэвуш Касцюшка атрымаў вельмі добрую. Спачатку ён вучыўся ў школе манаскага ордэна піяраў у горадзе Любяшаве Пінскага павета. Затым з адзнакай скончыў кадэцкі корпус у Варшаве, а пасля вучыўся ваеннай справе ў Парыжы.

Касцюшка праславіўся як нястомны змагар за свабоду ад рабства, каланіяльнай залежнасці, прыгоннага права. На працягу 7 гадоў ён быў у шэрагах добраахвотнікаў, якія змагаліся за незалежнасць ЗША. Пасля перамогі ЗША ў вайне Касцюшкі было прысвоена званне брыгаднага генерала.

Пасля вяртання на радзіму, Касцюшка, спрабуючы выратаваць незалежнасць дзяржавы і падтрымаўшы Канстытуцыю Рэчы Паспалітай, узначаліў паўстанне 1794 года.

Пасля смерці бацькі Т. Касцюшкі Марачоўшчына стала часткай палацава-паркавага комплексу Пуслоўскіх.

У 1942 годзе дом Касцюшкі згарэў пры пажары. У 1987 годзе тут быў усталяваны камень з памятнай таблічкай, на якой згадвалася, што гэтая сядзіба - малая радзіма Т. Касцюшкі. У 2001 годзе археолагамі былі зроблены раскопкі і былі выяўлены фундамент і сутарэнныя памяшканні жылога дома. На гэтым падмурку былі зроблены маштабныя работы - была адноўлена сядзіба і створаны мемарыяльны музей.

Сёння музей-сядзіба Тадэвуша Касцюшкі карыстаецца папулярнасцю ў турыстаў, выклікаючы цікавасць у наведвальнікаў сваёй багатай гісторыяй.

У экспазіцыі музея прадстаўлена зброя, прадметы побыту, будаўнічыя матэрыялы, знойдзеныя падчас археалагічных раскопак. Мы бачым тут прадметы побыту 17-19 стагоддзяў, адзенне, старажытныя манеты і папяровыя банкноты з выявай самога Т. Касцюшкі, а таксама яго асабістыя рэчы і дакументы. Сядзіба падзелена на 2 часткі: гістарычная частка, у якой узноўлены побыт сям'і Касцюшкі, і мемарыяльная частка, якая ўключае інфармацыю і матэрыялы аб нацыянальным герою.

Цікавая атмасферная хатка ў маляўнічым месцы! Экспазіцыі выдатна ствараюць агульнае ўяўленне аб жыцці беларускай шляхты ў той час, а таксама ў поўнай меры знаёмяць нас з жыццёвым шляхам гістарычнай асобы Касцюшкі.