Капцёўка. Успенская царква

У мястэчку Капцёўка Гродзенскага раёна знаходзіцца каменная Успенская царква. Царква была ўзведзена ў цэнтры мястэчка на месцы старога драўлянага храма, які ўзвялі яшчэ ў часы Вялікага Княства Літоўскага.

Драўляную царкву разабралі, і з добрых дошак і бярвення на мясцовых могілках пабудавалі капліцу, якую асвяцілі ў гонар Святога Георгія. У капліцу перанеслі і ўсе храмавыя рэчы і абразы, і тут адбываліся службы пакуль будаваўся новы храм. Пасля асвячэння новай царквы, капліцу на могілках пакінулі"для здзяйснення трэбаў пры могілках". Капліца існавала да сярэдзіны 20 стагоддзя.

 Старая драўляная царква была асвечана ў гонар Успення Прасвятой Багародзіцы. Храм быў у форме базілікі памерамі 12 метраў у шырыню і 23 метра ў даўжыню. Сядзіба ў мястэчку належала Станіславу Валіцкаму, які ахвяраваў 245 рублёў на рамонт царквы і патрабаваў ад сялян на храм таксама 123 рублі.

У 1864 годзе быў складзены дакумент аб неабходнасці рамонту драўлянага храма. Але былі і тыя, хто выступаў за пабудову новай царквы.

У 1867 годзе ўзвялі новы каменны храм.

Царква пабудавана па тыпавым праекце і разлічана на 300 чалавек. Асвяцілі храм у верасні 1867 года. Помнік складаецца з чатырох асноўных архітэктурных частак: бабінец, трапезная, малітоўная зала і апсіда. У інтэр'еры ёсць двух'ярусны іканастас.