Гродна. Парк Румлёва.

На ўскраіне горада Гродна ўздоўж ракі Нёман знаходзіцца помнік садова-паркавага мастацтва парк «Румлёва». Парк знаходзіцца на ўзвышшы і абмежаваны глыбокім ровам і берагам ракі.

Раней у цэнтры парку быў сядзібны дом, які не захаваўся да нашага часу. Затое ёсць каменная круглая вежа з бутавага каменя, якая была пабудавана ў 1880-я гады.

Калісьці гэтыя месцы ўваходзілі ў склад Гродзенскай пушчы.

У часы Расійскай імперыі ў сярэдзіне 19-га стагоддзя Ігнат Ляхніцкі прадае тэрыторыю парку Якаву Румелю. Даследчыкі мяркуюць, што ад прозвішча гэтага ўладальніка і пайшла назва парку. Наступным гаспадаром лесапарку стаў пан Відаліцкі. Наступны ўладальнік генерал Васількоўскі, а ўдава генерала прадала маёмасць ваеннай установе.

У 1914 годзе на тэрыторыі лесапарку знаходзіліся артылерыйскія батарэі.

Пасля Рыжскага міру 1921 года Гродна ў складзе Польскай дзяржавы да 1939 года-у парку размяшчаюцца часткі польскага войска.

Пасля вайны ў парку стварылі лагер для адпачынку дзяцей.

У 1990 годзе ў Румлёва адкрылася гімназія імя Яўхіма Карскага. Вучні і настаўнікі гімназіі пачалі падымаць пытанне аб ахове лесапарку і наданні яму ахоўнага статусу. І ў 1993 годзе згодна з рашэннем Гродзенскага гарадскога Савета дэпутатаў лесапарку Румлёва быў нададзены статус помніка прыроды мясцовага значэння.

У парку захаваліся векавыя дубы.