Гродна. Сядзіба Панямунь.

На ўскраіне горада Гродна на беразе ракі Нёман ёсць сядзіба пад назвай Панямунь. Сядзіба ўзводзілася ў 1771 годзе ў часы Вялікага Княства Літоўскага, як загарадная рэзідэнцыя апошняга караля Рэчы Паспалітай Станіслава Аўгуста Панятоўскага.

Будаўніцтва вялося па праекце архітэктара Ю.Аляхновіча ў стылі барока. Вакол сядзібы была рака і роў. Дамінантай архітэктурнай быў невялікі палац, а перад ім партэр. Побач быў пейзажны парк. Тэрасы ўмацоўваліся каменем. Пры ўездзе пабудавана каменная капліца 19-га стагоддзя ў стылі неаготыка. Службовыя і гаспадарчыя пабудовы знаходзіліся за параднай часткай сядзібы.

Палац аднапавярховы спачатку быў каменны, узведзены з цэглы. Затым частка будынка была заменена на драўляныя матэрыялы. Фасад палаца аздоблены порцікам з чатырма калонамі. Будынак капліцы прамавугольны ў плане, над якім узвышаецца васьмігранная вежа-званіца. Галоўны ўваход у храм вырашаны ў форме высокага стральчатага партала.

Да нашага часу захаваўся палац 18 – 19-га стагоддзяў, гаспадарчы будынак стайні, каменная капліца, фрагмент парку і каменныя ўмацаванні тэрас. Побач з сядзібай знаходзіцца парк адпачынку "Панямунь".