Гродна. Палац Сапегаў (вул. Савецкая, 10).

У горадзе Гродна на пешаходнай вуліцы Савецкай знаходзіцца каменны трохпавярховы будынак, які мае статус гісторыка-культурнай каштоўнасці і вядомы, як палац Сапегаў, Дом Саламона Лапіна, або Дом Хвялевіцкай.

Знаходзіцца на скрыжаванні вуліц Савецкай і Дамініканскай (па адрасе вул.Савецкая, 10). Помнік шмат разоў перабудоўваўся і цяпер мае рысы эклектычнай архітэктуры. Узведзены ў канцы 18-га стагоддзя як палац магнатаў Сапегаў.

Першапачаткова дом быў двухпавярховы. Тут былі жылыя кватэры, крамы і ўстановы. Размяшчалася Крама "Кніжны рускi гандаль", аптэка Жураўскага, натарыяльная кантора Басніна, пякарня і восем кватэр - гэта ў пачатку 20 стагоддзя.

 Пасля Рыжскага міру 1921 года Гродна перайшло пад уладу Польшчы да 1939 года. У гэты перыяд тут працавала аптэка Жураўскага ў 1926 годзе і рэстаран Х.Фрухта. Крыху пазней у 1930-я гады знаходзілася крама галантарэйных вырабаў і панчошна-шкарпэткавых вырабаў «Цэханскі і сыны».

Пасля Вялікай Айчыннай вайны на другім паверсе працавалі педагагічны і партыйныя кабінеты, а таксама майстэрня па вулканізацыі шын і заліванні галёшаў, кравецкая майстэрня і пякарня па вырабе кандытарскіх прадуктаў.

У 1970 годзе праведзена рэканструкцыя будынка і надбудова трэцяга паверха.

Зараз у будынку некалькі магазінаў і аддзелы адміністрацыі Ленінскага раёна горада Гродна.