Гродна. Дом Сапачынскага (вуліца Карла Маркса, 18).

       У горадзе Гродна на вуліцы Карла Маркса (нумар 18) ёсць помнік архітэктуры, які вядомы як Дом Сапачынскага. Вуліца Карла Маркса адна з найстарэйшых вуліц у Гродне, якая ўзнікла ў часы Вялікага Княства Літоўскага. У розныя часы вуліца мела розныя назвы, і ў 19 стагоддзі ў перыяд Расійскай імперыі называлася Купецкай.

           Дом Сапачынскага пабудаваны ў 1888 годзе ў стылі эклектыкі. Мае статус гісторыка-культурнай каштоўнасці. Будынак мураваны, двухпавярховы, атынкаваны. На парадным фасадзе дэкор захаваўся часткова і пераважна на другім паверсе. Частка дэкору была страчана падчас капітальнага рамонту. У цэнтры будынка захаваўся аўтэнтычны літы чыгунны балкон. У левай частцы будынка ёсць арачны праезд.

          Пасля савецка-польскай вайны і Рыжскага міру 1921 года горад Гродна апынуўся пад уладай Польшчы да прыходу савецкай улады ў 1939 годзе. У гэты перыяд у 1926 годзе ў гэтым будынку знаходзілася кіраванне гарэлачнай фабрыкі «Струбніца». У 1928 годзе працаваў магазін Голды Таповай па продажы мяса.

         Помнік архітэктуры ў апошнія гады адрэстаўраваны.