Багданава. Магіла мастака Фердынанда Рушчыца.

Турысты едуць у Багданава перш за ўсё дзеля таго, каб убачыць прыгожы сучасны касцёл. Спачатку каталіцкі храм быў драўляным, пабудаваны напачатку 19 стагоддзі. Пра першапачатковае аблічча касцёла мы можам меркаваць дзякуючы карціне мастака Фердынанда Рушчыца, які праславіў у сваіх творах сваю малую радзіму Багданава.

Ф. Рушчыц (1870 – 1936) пражыў цікавае і маляўнічае жыццё. Беларусь, Польшча і Літва лічаць яго сваім мастаком. Рушчыц быў мастак, педагог, графік і тэатральны дэкаратар. У яго творчасці характэрны рысы рэалізму і мадэрну. Радавым маёнткам Рушчыцаў было Багданава. Пасля паўстання Кастуся Каліноўскага, Рушчыцы здаюць маёнтак у арэнду і пераязджаюць у Лібаву, а потым у Мінск, дзе Фердынанд скончыў мужчынскую гімназію. Затым ён паступае ў Санкт-Пецярбургскую Імператарскую Акадэмію мастацтваў, дзе вучыцца ў вядомых мастакоў Івана Шышкіна і Архіпа Куінджы. Пасля завяршэння вучобы ён падарожнічае па Заходняй Еўропе, і жыве спачатку ў Польшчы, а потым у Вільні, дзе працуе ва Універсітэце ім. Стэфана Баторыя. У апошнія гады жыцця, калі Ф. Рушчыц цяжка хварэў, ён пераехаў жыць у свой радавы маёнтак у Багданава.

Мастак памёр 30 кастрычніка 1936 года. Пахаваны на мясцовых могілках. Некалькі карцін захоўваюцца ў Мінску ў Нацыянальным мастацкім музеі Рэспублікі Беларусь, у тым ліку карціна “Ля касцёла”. За апошнія гады ў Беларусі выдадзена некалькі кніг і фотаальбомаў, прысвечаных выбітнаму мастаку. Маёнтак, дзе нарадзіўся Рушчыц, згарэў падчас апошняй вайны. Да гэтага часу засталіся толькі рэшткі будынка і некалькі дрэў старога парка. Каб наведаць магілу мастака, трэба праехаць праз усю вёску Багданава, і ў канцы справа вы ўбачыце мясцовыя сучасныя могілкі. Туды вядзе грунтавая дарога. Прайдзіце да самых могілак. І з правага боку вы ўбачыце гару, на якую вядзе лесвіца. Калі падняцца па лесвіцы, то прыйдзеце да магілы Ф. Рушчыца.