Жодзіна. Манумент у гонар савецкай маці-патрыёткі.

Манумент у гонар савецкай маці-патрыёткі ў Жодзіне ўяўляе сабой скульптурную кампазіцыю з шасці фігур на невялікім пастаменце. Адна з фігур стаіць асобна - фігура маці, якая праводзіць сваіх сыноў на вайну. Вышыня помніка - 4 метры, фігуры выкананы з бронзы і граніту. Правобразам паслужыла савецкая маці-патрыётка Анастасія Фамінічна Купрыянава, якая адправіла на вайну ўсіх пецярых сваіх сыноў. Помнік адкрыты 29 жніўня 1975 года. Манумент знаходзіцца пад аховай дзяржавы, ён уключаны ў Дзяржаўны спіс культурных каштоўнасцей Рэспублікі Беларусь. Помнік уяўляе сабой сімвал подзвігу савецкіх жанчын у цяжкія гады Вялікай Айчыннай вайны.

Перш чым пачаць працу, мастакі сустрэліся з Анастасіяй Фамінічнай Купрыянавай, пазнаёмілі грамадскасць горада з праектам помніка. У самым пачатку працы прыйшлося памяняць размяшчэнне комплексу - з цэнтра горада перанесці яго на дарогу, бо такое размяшчэнне больш адпавядала задуме аўтараў. Праца была цяжкай, бо стварэнне такой вялікай кампазіцыі ўжо само па сабе ўяўляла складанасць: кожную фігуру неабходна было вырабляць асобна (велічыня яе складала два чалавечыя росты). Адліўка фігур з бронзы праводзілася ў Ленінградзе ў майстэрні мастацкага ліцця "Манументскульптура".

На ўрачыстую цырымонію адкрыцця манумента з'ехалася шмат гасцей з розных куткоў Беларусі і СССР. Прысутнічалі жыхары горада, ветэраны Вялікай Айчыннай вайны, былі заслужаныя людзі БССР, Героі Савецкага Саюза У.Я. Лабанок, М.Б. Осіпава і інш, Героі Сацыялістычнай Працы, прадстаўнікі ўлады, міністр культуры БССР Юрый Міхневіч, была і сама гераіня ўрачыстасці Анастасія Фамінічна Купрыянава, якой ужо было 103 гады. У гэтыя дні ў Мінску праходзіла Міжнародная сустрэча жанчын, многія з яе ўдзельніц прысутнічалі на адкрыцці, сярод якіх былі прадстаўніцы краін Савецкага Саюза, Еўропы, Паўднёвай Амерыкі і інш. Ганаровае права адкрыць манумент было дадзена старшыні Камітэта савецкіх жанчын, савецкаму лётчыку-касманаўту, першай жанчыне, якая пабыла ў космасе, Герою Савецкага саюза Валянціне Церашковай.

Аўтарамі манумента з'яўляюцца скульптары Андрэй Заспіцкі, Іван Міско, Мікалай Рыжанкоў, архітэктар Алег Трафімчук, кіраўнік творчага калектыву У.А. Лагуноўскі. За арыгінальнасць і высокамастацкае выкананне кампазіцыі творчы калектыў аўтараў у 1977 годзе быў удастоены Дзяржаўнай прэміі СССР.

У доме, дзе пражывала сям'я Анастасіі Фамінічны Купрыянавай, заснаваны музей – адзіны ў Беларусі музей, прысвечаны маці.