Жалудок. Палац Святаполк–Чацвярцінскіх.

У пачатку XX стагоддзя Святаполк-Чацвярцінскія пабудавалі на ўскраіне горада Жалудок сядзібна-паркавы архітэктурны комплекс. Палац і асноўныя будынкі былі пабудаваны пры князе Людвігу Рудольфе Святаполк-Чацвярцінскім (1877-1941). У архітэктурны комплекс уваходзяць: палац, флігель, млын, гамарня і іншыя гаспадарчыя пабудовы. Вакол палацавага комплексу быў створаны рэгулярны парк.

Палац цагляны і пабудаваны ў стылі неабарока ў 1908 годзе. Архітэктар Уладзіслаў Марконі (1848 – 1915) – вядомы польскі архітэктар і рэстаўратар.

Пасля вайны за савецкім часам у будынку палаца размяшчалася сакрэтная воінская часць. У 2010 годзе ў палацы здымалі беларускі мастацкі фільм "Разня" рэжысёра Андрэя Кудзіненкі. Лічыцца першым беларускім фільмам жахаў. Фільм расказвае пра мядзведзя-пярэваратня паводле беларускіх легенд і рамана Праспэра Мэрымэ.

Цяпер памяшканне набыла прыватная асоба. Плануецца аднаўленне.

Справа ад палаца ў парку размешчаны незвычайны цагляны флігель з мураванай вежай. Спачатку гэты будынак быў сядзібай, дзе жылі былыя ўладальнікі мястэчка Тызенгаўзы. Да пабудовы палаца тут жылі Святаполк-Чацвярцінскія.

Флігель знаходзіцца ў паўразбураным стане, але архітэктурна вельмі цікавы і незвычайны ў неагатычным стылі.

Каб патрапіць у палац і на тэрыторыю парка, трэба падысці да галоўнага ўваходу ў парк. Таму што ўся сядзіба акружана цагляным плотам. Каля ўвахода стаіць дом вартаўніка і за невялікую плату вам дазволяць наведаць палацава-паркавы комплекс. Парк вельмі густы, з алеямі і палянамі - выдатны ў любую пару года.