Здзітава. Мемарыяльны комплекс «Здзітаўская абарона».

У мястэчку Здзітава Бярозаўскага раёна створаны мемарыяльны комплекс, прысвечаны падзеям Вялікай Айчыннай вайны пад назвай «Здзітаўская абарона».

У склад мемарыяла ўваходзіць гармата, сцяна-стэла з імёнамі загінуўшых, трохгранны блок з лаўровым вянком і скульптура Партызана. 

Падчас вайны недалёка ад Здзітава знаходзіліся ў Спораўскіх балотах партызанскія атрады. У тым ліку тут размяшчаліся штаб Брэсцкага партызанскага руху - Брэсцкі падпольны абкам Камуністычнай партыі. Тут таксама працавалі рэдакцыі абласной і раённай газет "Зара" і "Полымя".

Увесну 1944 года гітлераўскія захопнікі перакінулі ў гэты раён вялікія воінскія фарміраванні для барацьбы з партызанскім рухам. У тым ліку выкарыстоўваліся танкі і бронемашыны з авіяцыяй.

Трэцяга красавіка гітлераўцы пачалі наступ. Партызаны і каля 10 тысяч мірнага насельніцтва апынуліся ў акружэнні. Калі ў партызан скончыліся боепрыпасы, было прынята рашэнне адысці на другую лінію абароны. Гітлераўцам не ўдалося ліквідаваць партызанскую зону. Захопнікі падчас гэтай карнай аперацыі страцілі забітымі і параненымі 600 чалавек.

У гонар гэтых гераічных падзей у 1975 годзе быў створаны мемарыяльны комплекс, аўтарамі якога з'яўляюцца Архітэктар У.Пак і скульптар У. Кліменка.