Бездзеж. Касцёл Святой Троіцы

У Драгічынскім раёне ёсць старажытнае мястэчка Бездзеж. Упершыню ўпамінаецца ў 1409 годзе і лічыцца самым старым мястэчкам Дарагічынскага краю. У часы Вялікага Княства Літоўскага ўваходзіла ў склад Брэсцкага ваяводства Пінскага павета.

У Бездзежы ёсць некалькі храмаў і гістарычных артэфактаў і ў тым ліку музей. Маецца прыдарожная мураваная капліца, якая пабудавана ў гонар канстытуцыі 3 мая 1791 года - гэта па адной з версій, бо ёсць і іншыя меркавані. Напрыклад, што яе пабудавалі ў гонар падзей Паўночнай вайны. Мясцовыя жыхары яе называюць «Чырвоная вежа», «капліца», або «Віжа». Некалькі год таму капліцу атынкавалі і пабелілі.

Пасля трэцяга падзелу Рэчы Паспалітай Бездзеж быў далучаны да Расійскай імперыі і спачатку ўваходзіў у склад Слонімскай губерніі, потым Літоўскай і Гродзенскай.

У часы Вялікай Айчыннай вайны 146 жыхароў мястэчка не вярнулася з фронта і ў памяць аб іх быў усталяваны помнік у 1975 годзе.

 У цэнтры мястэчка ёсць каталіцкі касцёл , які асвечаны ў гонар Святой Троіцы. Касцёл пабудаваны ў 1818 - 1820 гадах ў стылі класіцызму. Фундатарамі каталіцкай святыні былі прадстаўнікі вядомага роду Ордаў, з якога паходзіць мастак і кампазітар Напалеон Орда.

Будынак у плане мае прамавугольную форму і накрыты двухсхільным вальмавым дахам. На галоўным фасадзе размешчаны над уваходным парталам трохвугольны франтон. Інтэр'ер аднанефны. Раней перад касцёлам была трохярусная мураваная вежа–званіца, якая не захавалася да нашага часу.