Заслаўе. Касцёл Нараджэння Найсвяцейшай Панны Марыі.

Першы драўляны касцёл быў пабудаваны ў Заслаўі яшчэ ў 1627 г. тагачаснымі ўладальнікамі горада Глебавічамі. У 1753 годзе Заслаўе і яго наваколле набывае Антоні Пшаздзецкі, граф Заслаўскі, дзяржаўны дзеяч ВКЛ. За 150 гадоў стары драўляны касцёл састарэў, і да 1774 года на яго месцы ўзвялі новы каменны велічны касцёл па ініцыятыве і на сродкі новага ўладальніка Заслаўя. Ёсць непацверджаная версія, што аўтарам праекта быў італьянскі архітэктар Джавані Батыста. Касцёл пабудаваны ў стылі позняга барока. Аднанефны, мае паўкруглую апсіду і дзве рызніцы. Таўшчыня сцен храма дасягае 2 метраў. У ніжняй частцы, пад алтаром, размяшчаўся магільны склеп сям'і Пшаздзецкіх.

Пасля "польскага" паўстання 1863 года, касцёл закрываюць. Праз некалькі гадоў, пасля перабудовы ў 1868 годзе, касцёл асвячаюць як праваслаўную царкву. Быў зняты шчыпковы дах, і заменены светлавым барабанам. Мясцовыя каталікі прасілі захаваць старажытны абраз Панны Марыі, захавалася таксама найменне храма ў гонар Раства Багародзіцы.

Царква ў сценах былога касцёла існавала да вайны, у 1941 г. будынак быў пашкоджаны, службы спыніліся. Па расказах мясцовых, снарад упаў прама ў сярэдзіну, прабіў дах і па нейкай прычыне там не ўзарваўся. Але дах быў разбураны, а сцены ацалелі практычна да самага верху. Да 1998 года будынак пуставаў, пакуль не быў перададзены зноў каталікам. Рэстаўрацыя паўразбуранага будынка зацягнулася, але пры гэтым у 2013 годзе касцёл асвячоны арцыбіскупам Тадэвушам Кандрусевічам.