Юшкавічы. Руіны касцёла.

     У Мядзельскім раёне ў мястэчку Юшкавічы захаваліся руіны каталіцкага касцёла.

       У Юшкавічах у часы Расійскай імперыі ў пачатку 19-га стагоддзя была ўніяцкая царква. У 1863 годзе праваслаўная царква ў Юшкавічах адносілася да царквы ў Мядзелі. У 1868 годзе царкву капітальна адрамантавалі.

      У 1904 годзе ў мястэчку быў фальварак Купрэвічаў, сядзіба Лявонавічаў і засценак Нафрановічаў. Юшкавічы ўваходзілі ў склад Віленскай губерні Вілейскага павета.

       Мястэчка Юшкавічы пасля савецка–польскай вайны і Рыжскага міру 1921 года перайшло да польскай дзяржавы да прыходу савецкай улады ў 1939 годзе. У гэты час у Юшкавічах быў пабудаваны каталіцкі храм.

        Касцёл пабудавалі ў 1930-я гады на ўсходнім ускрайку мястэчка. Храм узвялі на падмурку з бутавага каменя. Касцёл адносіўся да парафіі ў горадзе Мядзел, і з горада ў Юшкавічы прыязджаў ксёндз для правядзення набажэнстваў, бо свайго святара не было.

       Будынак складаецца з трох асноўных архітэктурных частак: бабінец, асноўны аб'ём і апсіда. Над бабінцам надбудавана чацверыковая вежа, накрытая чатырохсхільным дахам.

       Пасля Вялікай Айчыннай вайны ў касцёле працавала мясцовая школа. Калі пачала працякаць дах у будынку, то храм не сталі рамантаваць, а пакінулі будынак без увагі.

     Цяпер ад храма засталіся толькі сцены і вежа.