Некасецк. Царква Святой Тройцы.

        У Мядзельскім раёне па шляху з Мядзела на Докшыцы ёсць невялікі пасёлак Некасецк. На ўскраіне мястэчка захавалася драўляная праваслаўная царква Святой Тройцы. Мястэчка невялікае і ўваходзіла ў склад Слабадскога сельсавета.

        Пасля савецка–польскай вайны і Рыжскага міру ў 1921 годзе, Некасецк перайшоў пад уладу польскай дзяржавы. У складзе Польшчы мястэчка было да 1939 года да прыходу савецкай улады. У гэты перыяд мястэчка ўваходзіла ў Мядзельскую гміну Пастаўскага павета Віленскага ваяводства. У 1940-1954 гадах з'яўлялася цэнтрам Некасецкага сельсавета.

      У часы Польшчы на ўскраіне Некасецка была пабудавана праваслаўная царква, якую асвяцілі ў гонар Святой Тройцы. Храм пабудаваны на грошы памешчыка Чарняўскага.

      Царква драўляная на каменным падмурку з бутавага каменя, узведзена ў стылі народнага драўлянага дойлідства. У плане царква мае прамавугольную форму. Зроблена з драўлянага бруса, які абабіты дошкамі.