Талочын. Пакроўская царква і жаночы манастыр

У самым цэнтры горада Талочын узвышаецца Пакроўская праваслаўная царква. Калі вы пад'едзеце да будынка, то адразу ўбачыце, што Архітэктура храма зусім не адпавядае праваслаўным канонам. Першапачаткова гэта быў каталіцкі касцёл і ўніяцкая царква.

Касцёл быў узведзены ў пачатку 17 стагоддзя на грошы канцлера Льва Сапегі. Затым у 1769 годзе ўжо магнатамі Сангушкамі будуецца новы будынак касцёла. Пры храме ў 1779 годзе ўзводзіцца ўніяцкая школа базыльянаў і манастырскі корпус базыльянаў. У канцы 18 стагоддзя касцёл перададзены пад уніяцкую царкву. У пачатку 19-га стагоддзя храм быў перададзены ўжо пад праваслаўную царкву, якую назвалі Пакроўскай. У 1812 годзе ў манастырскім корпусе спыняўся Напалеон Банапарт.

Царква з'яўляецца помнікам архітэктуры позняга барока, так званага віленскага барока. Будынак уяўляе з сябе трохнефную двухвежавую базіліку з двума сакрысціямі, якія знаходзяцца па баках апсіды. Галоўны фасад царквы мае хвалісты контур. Дзве шмат'ярусныя вежы ўзвышаюцца над фасадам. Паміж вежамі фігурны франтон. Інтэр'ер падзелены на 3 нефы 4 слупамі-пілонамі. Галоўны каменны алтар 18 стагоддзя, быў у 19 стагоддзі зачынены драўляным іканастасам, калі храм перадалі праваслаўным. Інтэр'ер храма аздоблены паліхромнымі роспісамі. У храме ёсць старадаўнія іконы 17-18 стагоддзяў.

У савецкія часы ў будынку манастыра знаходзіўся мясцовы ваенкамат. Будынак вярнулі вернікам у 1990-х гадах. Зараз тут працуе Свята-Пакроўскі жаночы манастыр.