Скокі. Сядзіба Нямцэвічаў.

Сядзіба Нямцэвічаў з'яўляецца помнікам архітэктуры барока і мае характэрную для архітэктуры барока пластычную аб'ёмна-прасторавую кампазіцыю. Таксама яна з'яўляецца помнікам садова-паркавага мастацтва ў "французскім" стылі. Доўгія гады будынак сядзібы знаходзіўся ў жаласным стане. Аднак, у 2006 годзе была праведзена маштабная рэканструкцыя і зараз тут дзейнічае гісторыка-мемарыяльны музей "Сядзіба Нямцэвічаў".

Сядзіба ў Скоках належала вядомаму роду Нямцэвічаў. Яна была закладзена Марцэліем Нямцэвічам. Яго сын Юльян Нямцэвіч - грамадскі дзеяч, пісьменнік, блізкі сябар Тадэвуша Касцюшкі, які апісаў у сваіх мемуарах падзеі 18 - пачатку 19 стагоддзяў, якія адбываюцца на Брэсцкіх землях. Станіслаў Нямцэвіч - маршалак шляхты Гродзенскай губерні, генерал-маёр, губернатар Гродна. Ян Нямцэвіч - маршалак шляхты Гродзенскай губерні.

Гісторыя сядзібы захоўвае шмат цікавых падзей, тут пабывала вялікая колькасць вядомых асоб, якія наведвалі сям'ю Нямцэвічаў: Ян Флемінг, князі Чартарыйскі і Шуйскі, расійскі імператар Аляксандр 3, кампазітар і мастак Напалеон Орда.

У час Першай сусветнай вайны сядзіба моцна пацярпела. Тут знаходзілася стаўка камандуючага Усходнім германскім фронтам прынца Баварскага Леапольда. 15 снежня 1917 года тут было падпісана перамір'е паміж Германіяй і Расіяй, у выніку былі спынены ўсе ваенныя дзеянні ад Балтыйскага да Чорнага мораў.

Пасля Вялікай Айчыннай вайны да 1986 года ў былой сядзібе знаходзілася школа. Да 2006 года палац не выкарыстоўваўся, знаходзячыся ў занядбаным стане.

Сёння, пасля праведзеных работ па аднаўленні і рэстаўрацыі, гэта выдатны музей з цудоўнымі інтэр'ерамі. Вельмі цікавае і багатае напаўненне экспазіцыі. Музей створаны з вялікай цікавасцю і ўвагай да мінулай эпохі. Тут не стамляешся разглядаць кожны прадмет у інтэр'еры гасцінай, бальнай залы, зброевай, спальні, гульнявой. Выдатная мэбля, шыкоўныя карціны.

Прыгожая і дагледжаная сядзіба Нямцэвічаў абавязкова варта наведвання! Ідэальнае месца для фотасесіі!

Дарэчы, тут праводзяцца цікавыя відовішчныя мерапрыемствы: Скокаўскія балі (студзень, май, кастрычнік); ваенна-гістарычны фестываль, прысвечаны тэме Першай сусветнай вайны (снежань).