Пладовая. Царква Нараджэння Божай Маці

У мястэчку Пладовая Мастоўскага раёна знаходзіцца пры дарозе мураваны праваслаўны храм. Царкву пабудавалі ў 19 стагоддзі і асвяцілі ў гонар Нараджэння Божай Маці.

Упершыню мястэчка ўпамінаецца ў гістарычных крыніцах у 16 стагоддзі ў часы Вялікага Княства Літоўскага. У гэты перыяд князь Крошынскі залажыў маёнтак ў гэтых мясцінах. Потым маёмасць пераходзе да магнатаў Сапегаў. Наступнымі гаспадарамі былі Камароўскія, а затым Шэметы. У 1663 годзе Шэметы прадалі маёнтак смаленскаму кашталяну Самуэлю Вільчаку. Затым маёнтак выкупілі зноў Сапегі. Напрыканцы 18 стагоддзя маёнтак у Сапегаў набыў князь Францішак Друцкі – Любецкі і гэты род быў тут гаспадаром да 1939 года. Да нашага часу засталіся парэшткі сядзібы Друцкіх – Любецкіх.

Царква пабудавана ў 1871 годзе па тыпавому праекту. Храм створаны за сродкі прыхаджан і частку грошай выдаткавала дзяржаўная казна.

Помнік пабудаваны ў рэтраспектыўна – рускім стылі. Будынак складаецца з чатырох асноўных архітэктурных частак: прытвор, трапезная, малітоўная зала і апсіда. Над прытворам узведзена двухярусная вежа – званіца васьмярык на чацвярыку. Малітоўная зала накрыта чатырохсхільным дахам на версе якога васьмігранны барабан і купал – цыбуліна.