Аранчыцы. Царква Узвіжэння Святога Крыжа.

У Пружанскім раёне ёсць мястэчка Аранчыцы, дзе калісці была сядзіба Ляжэнскіх і да нашага часу захавалася мураваная праваслаўная царква Узвіжэння Святога Крыжа.

Мястэчка ўпершыню ўпамінаецца ў дакументах у эпоху Вялікага Княства Літоўскага ў 16 стагоддзі і калі тут жыў род Аранскіх. У эпоху караля Жыгімонта Аўгуста быў заснаваны маёнтак Аранскімі ў 1560 годзе. Яны пабудавалі тут драўляны палац. Даследчыкі мяркуюць, што назва мястэчка пайшла ад прозвішча ўладальнікаў маёнтка. Праз нейкі час маёнтак перайшоў да роду Іжыцкіх, а потым да Ляжэнскіх.

У часы Расійскай імперыі ў 1914 годзе на ўскраіне мястэчка была пабудавана мураваная праваслаўная царква. Дагэтуль на гэтым месцы існавала драўляная царква. Храм пабудаваны па тыпавому праекту ў рэтраспектыўна–рускім стылі.

Будынак складаеца з кананічных асноўных чатырох частак, якія ўтвараюць падоўжаную восевую кампазіцыю: прытвор, трапезная, малітоўная зала і апсіда. Над прытворам узведзена шматярусная вежа–званіца васьмярык на чацвярыку, якая завершана высокім шматгранным шпілем з купалам–цыбулінай.

У інтэр'еры ёсць драўляны іканастас і маюцца старажытныя абразы 18-га стагоддзя: «Маці Божая Адзігітрыя» і «Святы Мікалай».