Крошын. Касцёл Божага Цела

Праехаўшы праз усё мястэчка Крошын, вы на ўскрайку пабачыце каля дарогі белы невялікі каталіцкі касцёл. Першы касцёл у Крошыне пабудаваны яшчэ у 15 стагоддзі. А ў 1818 узведзены новы драўляны кталіцкі храм. Касцёл Божага Цела быў пабудаваны ўжо ў часы Польскай дзяржавы ў 1920 – я гады. У савецкія часы касцёл зачынены і тут знаходзіўся музей беларускага паэта Паўлюка Багрыма, які нарадзіўся ў Крошыне ў 1813 годзе. За ўдзел у сялянскім бунце і напісанне анціўрадавых вершаў Багрым быў аддадзены ў войска ў рэкруты. Пахаваны паэт адразу за касцёлам на старадаўніх могілках.

 Будынак касцёла прамавугольны ў плане з двухсхільным дахам. Завяршае асноўны аб'ём трохгранная апсіда. Галоўны фасад мае двухярусную кампазіцыю. Па краям фасада невялікія чатырохгранныя вежы. У падмурак будынка ўмурованы старыя надмагільныя пліты.

 Інтэр'ер касцёла ўпрыгожаны бронзавай жырандоляй (люстрай), якую зрабіў паэт Паўлюк Багрым у 19 стагоддзі. Жырандоль зроблена з бронзы і чугуна ў выглядзе абруча, які трымаецца на трох металічных прутах. Коўка жырандолі  ажурная і арнаментальная, мае вялікую мастацкую каштоўнасць. Каля касцёла з лева знаходзіцца памятны валун з надпісам на беларускай і лацінскай мове: «Жыццё кароткае – Радзіма вечная».