Крывічы. Касцёл Святога Андрэя і манастыр трынітарыяў.

      У мястэчку Крывічы Мядзельскага раёна пабудаваны касцёл Святога Андрэя і кляштар каталіцкага ордэна трынітарыяў. Святыня знаходзіцца на галоўнай вуліцы па шляху на Будслаў, і таму прыехаць да помніка вельмі проста.

       Касцёл спачатку пабудавалі драўляны ў часы Вялікага Княства Літоўскага ў 1777 годзе на грошы Андрэя Укольскага, які займаў пасаду падкорму Троцкага. У касцёл прыехалі манахі трынітарыі з Галіцыі. Касцёл быў разлічаны на шэсць манахаў. Праз некаторы час пачалося будаўніцтва мураванага каталіцкага храма. І ў 1796 годзе быў узведзены новы касцёл, які асвяцілі ў гонар Святога Андрэя.

         У пачатку 19-га стагоддзя ў часы Расійскай імперыі касцёл быў цэнтрам парафіі, і пры ім працавала шэсць капліц. Пры манастыры працаваў шпіталь.

      Пасля антырасійскага паўстання 1830-1831 гадоў Манастыр трынітарыяў зачынілі. У 1883 годзе вакол касцёла была пабудавана каменная агароджа з бутавага каменя. У 1907 годзе ў касцёле памянялі драўляную падлогу на плітку з геаметрычным арнаментам.

     У савецкія часы касцёл працаваў.

      Храм пабудаваны ў стылі позняга віленскага барока. Будынак - аднанефавая базіліка. Над уваходам трох'ярусная вежа-званіца. У інтэр'еры галоўны алтар выкананы ў стылі барока з фігурамі Ісуса, Святога Паўла, Святога Пятра, Маці Божай і Яна Евангеліста.

      У касцёле размяшчаецца мемарыяльная дошка, якая прысвечана пісьменніку Яну Барэйку-Ходзьку, які нарадзіўся ў 1777 годзе ў Крывічах.