Казлоўшчына. Капліца-пахавальня князёў Друцкіх-Любецкіх.

Капліца знаходзіцца на могілках побач з асноўнай дарогай і вельмі добра праглядаецца з розных бакоў. Справа ад капліцы ўстаноўлена скульптура Панны Марыі. Шыльда над уваходам у капліцу пацвярджае інфармацыю пра тое, што гэтая каталіцкая капліца закладзена ў сярэдзіне XIX стагоддзя і належыць роду Друцкіх-Любецкіх.

Капліца і самі могілкі выглядаюць вельмі акуратна. Паўсюль зеляніна, кветкі і невялікія элементы дэкору. Захапляе характар мура капліцы: рознакаляровыя валуны старанна апрацаваны і падабраныя, як-быццам у мазаіцы. Будынак мае прамавугольную форму, перакрыты двухсхільным дахам. Над фасадам знаходзіцца трохвугольны франтон, узвышаецца невялікая сігнатурка (малая Храмавая вежа).

Бутавы мур сцен упрыгожваюць адтынкаваныя і пабеленыя архітэктурныя элементы-каля ўваходу, каля вокнаў і карнізаў. У капліцы маецца два паверхі. У верхнім-праходзяць службы, у ніжнім, цокальным, знаходзяцца магільныя нішы, якія зачыненыя плітамі з надпісамі, частка з якіх пашкоджана. 

Верхняе памяшканне мае форму прамавугольніка і выцягнута з захаду на ўсход. У алтарнай частцы размешчаны абразы, над уваходам былі невялікія хоры з пашыранай пляцоўкай для размяшчэння невялікага органа або фісгармоніі. Сіметрычна з правага і левага бакоў былі ўсталяваныя па два вокны з рамамі ў выглядзе каталіцкіх крыжоў. У левай прыалтарнай частцы захаваліся дзве шыльды часоў жыцця Друцкіх-Любецкіх і іх сваякоў з указаннем памятных дат роду. У падлозе цэнтральнай частцы пахавальні ёсць закрыты люк, які вядзе ў крыпту (падземны ход) цокальнага паверха. Раней тут была лесвіца. Там у падзямелле ёсць шэраг надмагілляў, якія да гэтага часу не расшыфраваныя.

 Памяшканне крыпты ўяўляе сабой арачны склеп з двума радамі ніш ў сценах. Унутры яно пакрыта чырвонай глінай і атынкавана. У некаторых месцах тынкоўка адвалілася ад вільгаці або была адбітая людзьмі. Усяго ў крыпце налічваецца 12 паглыбленняў, частка з якіх з самага пачатку існавання пахавальні была пустая. Колькасць ніш вызначана і адпавядае колькасці апосталаў Ісуса Хрыста. Калі палічыць, то ў крыпце маглі атрымаць свой вечны супакой прадстаўнікі трох-чатырох пакаленняў уладальнікаў Казлоўшчына. Гэта значыць, што калі Ігнат Друцкі-Любецкі ўзводзіў пахавальню, то спадзяваўся, што яго нашчадкі будуць валодаць маёнткам як мінімум да сярэдзіны 20-га стагоддзя. Але падобна, што толькі ў чатырох нішах знаходзяцца труны з нябожчыкамі, так як толькі на гэтых 4 магільных плітах ёсць эпітафіі з прозвішчамі і датамі жыцця і смерці.

Устаноўлена, што ў пахавальні дакладна пахаваныя сам гаспадар сядзібы Ігнат Друцкі-Любецкі, яго жонка Адэлаіда, яго цешча Канстанцыя Уласоўская і нейкая Марыя роду Сніткаў. Што гэта за асоба дагэтуль застаецца невядома, бо сярод уладальнікаў маёнткаў на Пастаўшчыне такой не значылася. Яе з'яўленне ў магільным склепе нараджае розныя легенды і меркаванні.

 У савецкі час пахавальня была закінута і часткова пашкоджана і разрабавана. Сіламі мясцовых ксяндзоў і вернікаў святыня была адрамантавана і цяпер дзейнічае як невялікі касцёл пад заступніцтвам святога Апостала Пятра. У крыпце рамонт не праводзіўся, яна знаходзіцца ў сваім першапачатковым выглядзе і на сённяшні дзень значна пашкоджана. Ад поўнага знішчэння пахавальню выратавала тое, што знаходзілася яна на вясковых могілках, якое з 19-га стагоддзя мае сваю агароджу. Ніжняя частка яго вымураваная бутавым каменем, на адным з якіх захавалася дата будаўніцтва "R 1852".

Дзякуючы намаганням мясцовых жыхароў, месца пахавання князёў роду Друцкіх-Любецкіх і само могілках выглядае вельмі чыстым, акуратным і дагледжаным.