Мосар. Касцёл і дэндралагічны комплекс

Касьцёл Сьвятой Ганны, пабудаваны ў 18 стагодзьдзі ў вёсцы Мосар, зьяўляецца адной з асноўных яе выбітнасьцяў.

На тэрыторыі касцёла размешчаны старажытная брама і агароджа 19 стагоддзя, цэлы шэраг непаўторных рэлігійных скульптур, многія з якіх адзіныя ў сваім родзе ў Беларусі, што робіць Мосар унікальным паломніцкім комплексам. У найпрыгажэйшай капліцы 1997 года пабудовы захоўваецца копія Вастрабрамскай іконы Божай Маці, сама ж капліца ўяўляе сабой паменшаную копію арыгінальнай Вастрабрамскай капліцы.

У 1988 г. пробашчам касцёла быў прызначаны Ёзас Булька, які праслужыў у ім больш за 20 гадоў. Дзякуючы намаганням ксяндза вёска Мосар атрымала новае нараджэнне, ператварыўшыся ў аазіс прыгажосці, якую ў народзе сталі называць «беларускім Версалем»: ён стварыў вялікі батанічны сад са скульптурнымі копіямі сусветна вядомых шэдэўраў.

Таксама пробашч касцёла быў вядомы як прыхільнік здаровага ладу жыцця і змагар з п'янствам: пры ім вёска Мосар, як і ўся тэрыторыя Удзелаўскага сельсавета Глыбоцкага раёна Віцебскай вобласці, стала "цвярозай зонай", дзе ў магазінах нельга было знайсці алкаголь (замест гэтага пачалі прадаваць лімоны. ). У былой званіцы касцёла быў арганізаваны адзіны ў сваім родзе антыалкагольны музей, у які мясцовыя жыхары здавалі свае самагонныя апараты, у ім захоўваліся іх распіскі аб тым, што яны адмаўляюцца ўжываць спіртное.

На тэрыторыі касцёла з часам была арганізавана Алея цвярозасці, дрэвы на якой саджалі Таварыствы ананімных (былых) алкаголікаў з Беларусі, Польшчы і Літвы.

Гэта незвычайная экспазіцыя таксама прыцягвае ўвагу ўсіх падарожнікаў.

Тут можна правесці цэлы дзень, вывучаючы разнастайныя каталіцкія скульптуры і спазнаючы іх сімвалічнае значэнне, а таксама павольна гуляючы ўздоўж парка па алеях, якія вядуць да крыніцы са святой вадой багатай мінеральнымі рэчывамі, з цікавасцю зазіраючы ва ўсе куткі, акрэсленыя зялёнай загараддзю. З'яжджаць проста не жадаецца: прырода тут неверагоднай прыгажосці, а ў паветры лунае спакой і прымірэнне.