Гродна. Дом Яманта (вул. Карла Маркса, 3).

       У горадзе Гродна ад Савецкай плошчы да аўтавакзала ідзе вуліца Карла Маркса. Яна пачынаецца ад касцёла Францішка Ксаверыя. Працягласць вуліцы каля 700 метраў. У часы Вялікага Княства Літоўскага вуліца называлася Азёрская, і вяла з гандлёвай плошчы.

              Вуліца ў тыя часы лічылася адным з цэнтраў гандлю і тут будаваліся шматлікія крамы і камерцыйныя арганізацыі. У 16 стагоддзі на вуліцы жылі пераважна рамеснікі. Далей вуліца вяла на ўсход на Скідзель. У 17-18 стагоддзі на вуліцы сталі пераважаць ужо шляхецкія сядзібы і культавыя будынкі. У 17-18 стагоддзях узведзены архітэктурныя комплексы брыгітак і кляштара езуітаў. На рагу вуліцы і гандлёвай плошчы ў 16-18 стагоддзі пабудавана Баторыеўка, або палац Сапегаў.

            У часы Расійскай імперыі назва вуліцы была Купецкая. Калі пачынаеце ісці з Савецкай плошчы, то злева ў вас касцёл Ксаверыя, а справа вуглавы трохпавярховы будынак Баторыеўка (К.Маркса, 1).

               Наступны па правым краі будынак пад № 3. Гэта каменны двухпавярховы дом. У пачатку 20-га стагоддзя ў часы Расійскай імперыі тут знаходзіўся каменны дом Яманта, а часам пішуць яго прозвішча як Ямонт. Потым дом належаў Якубу Любічу. У 1911 годзе тут жыў Хаім Шапіра, які працаваў лекарам.

            У часы Польскай дзяржавы ў 1928 годзе ў будынку працавала пякарня Ёзэля Каплана і крама ю.Беркі. Старадаўні будынак быў знішчаны падчас Вялікай Айчыннай вайны ў 1944 годзе.

            Адноўлены дом у 1990-2000-х гадах. Цяпер тут працуе "Гарадзенская кавярня".