Бешанковічы. Сядзіба Храптовічаў.

Бешанковічы вельмі зручна размешчаны на беразе буйной ракі Заходняя Дзвіна, якая з'яўляецца старажытным гандлёвым шляхам. Горад вядомы з 15 стагоддзя і ў розны час належаў розным уладальнікам, у тым ліку каралям і магнатам.

У 17 стагоддзі Бешанковічы былі ўласнасцю роду Агінскіх, якія пабудавалі драўляную сядзібу. А з 1770-х гадоў новымі ўладальнікамі сталі магнаты Храптовічы. Яахім Храптовіч (1729 – 1812) – канцлер Вялікага княства Літоўскага, палітычны і грамадскі дзеяч, які шмат зрабіў для развіцця эканомікі і культуры на тэрыторыі Беларусі. Менавіта Іаахім Храптовіч пабудаваў палац у Бешанковічах.

У самым цэнтры горада знаходзіцца палацава-паркавы архітэктурны комплекс магнатаў Храптовічаў. У Бешанковічах засталося нямала гістарычных мясцін, але першае, што тут варта наведаць - гэта ўбачыць гэты невялікі палац каля прыгожага, утульнага парку з сажалкай. Побач з палацам былі пабудаваны аранжарэя і гаспадарчыя пабудовы. Цяпер у будынку палаца знаходзіцца дзіцячая мастацкая школа.

Палац Храптовічаў - помнік архітэктуры ў стылі класіцызму. Двухпавярховы, П - вобразны ў плане будынак. У галоўным будынку, над парадным уваходам, ёсць балкон з чыгуннай дэкаратыўнай агароджай - мастацкім ліццём XIX стагоддзя. Часткова захаваўся парк у французскім стылі – дзве сажалкі і насаджэнні дубоў, ліп і клёнаў. Недалёка ад палаца рос старажытны дуб, каля якога, паводле легенды, у 1812 годзе адпачываў Напалеон. Дрэва засохла некалькі гадоў таму.