Жодзішкі. Касцёл Святой Тройцы.

Мястэчка Жодзішкі вядома з 16-га стагоддзя. Тут захавалася некалькі помнікаў архітэктуры, у тым ліку старажытны касцёл Святой Тройцы. Першы касцёл быў закладзены ў 16 стагоддзі мясцовымі ўладальнікамі горада, прадстаўнікамі шляхецкага роду Осцікавічаў. У канцы стагоддзя наступныя ўладальнікі мястэчка, магнаты Кішкі, будуюць цагляны пратэстанцкі храм - кальвінскі збор. Будынак пабудаваны ў стылі рэнесанс. У іншых крыніцах паведамляецца, што ў пачатку 17-га стагоддзя каралеўскі ротмістр Крыстаф Камар заснаваў кальвінскую абшчыну.

У сярэдзіне 17-га стагоддзя ў храме было тры алтары: Божай Маці Ларэтанскай, Святой Ганны і галоўны алтар у гонар Святой Тройцы. У падзямеллях будынка зроблена крыпта, дзе былі пахаваны заснавальнікі храма. Побач з храмам былі пабудаваны бальніца і парафіяльны дом (плябанія).

З часам, кальвінісцкі збор перайшоў да каталікоў. У 19 стагоддзі вакол касцёла была пабудавана цагляная агароджа. У 1902 годзе да храма былі прыбудаваны бакавыя капліцы. У час Першай сусветнай вайны нямецкія войскі арганізавалі ў храме шпіталь. У часы Польшчы тут служыў свяшчэннікам вядомы беларускі дзеяч Вінцэнт Гадлеўскі (1888 – 1942). У 1930-я гады інтэр'ер касцёла распісаў вядомы беларускі мастак Пётр Сергіевіч. Храм дзейны.

Касцёл аднанефны. Крыжападобны ў плане. Галоўны фасад плоскі. Інтэр'ер упрыгожаны роспісамі. Ёсць тры алтары.