Тураў. Царква Усіх Святых.

Царква драўляная, была ўзведзена ў гады 1801-1810 протаіерэем Антоніем Лойкам. Цяпер афіцыйна прызнана помнікам народнага дойлідства.

Царква Усіх Святых выстаяла, зведаўшы выпрабаванні трох вялікіх войн (Айчыннай 1812 года, Першай сусветнай, Вялікай Айчыннай вайны). Да 1930 года яна служыла ў асноўным для здзяйснення памінальных службаў. За шматгадовае сваё існаванне ні разу не гарэла. Пасля 1945 года царква некаторы час не дзейнічала - памяшканні служылі складам - і аднавіла службы ў 1980 годзе, да 1000-гадовага юбілею горада. У 2002 годзе ўнесена ў Дзяржаўны спіс гісторыка-культурных каштоўнасцей Рэспублікі Беларусь. У 2005 годзе, да святкавання 1000-годдзя Тураўскай епархіі, на храме ўзвялі пазалочаныя купалы.

У плане будынак уяўляе сабой стандартны культавы будынак. 3-х зрубны храм складаецца з прамавугольнага аб'ёму, у якім аб'яднаны прытвор і бабінец, квадратнай у плане малітоўнай залы і апсіды. Першапачаткова зрубы завяршаліся шатровымі дахамі з галоўкамі і крыжамі. У пачатку XX ст. шатры заменены 2-хсхільным дахам, з захаду над бабінцам надбудавана 2-х'ярусная шатровая званіца (васьмерык на чацвярык). Вертыкальна абабітыя фасады прарэзаны аконнымі праёмамі (прамавугольнымі ў бабінцы і са зрэзанымі кутамі ў алтары), уваход вылучаны 2-х слупковым ганкам пад 2-х скатным падстрэшкам. У малітоўную залу шырокім прастакутным прасветам адчыняецца бабінец. Алтарная частка аддзелена ад асноўнага аб'ёму 2-х ярусным разным іканастасам. Царская брама ў стылі ракако ўпрыгожана ракайлямі і разеткамі.

Калісьці гэта была могілкавая царква, яна служыла пераважна для правядзення памінальных службаў. Зараз царква акуратна афарбавана блакітнай фарбай, могілкі добраўпарадкаваны. Службы праводзяцца розныя, літургіі ўключна.

Маленькая, сціплая, без пышнасці ўбрання, царква Усіх Святых захоўвае вялікія шанаваныя святыні: абраз Кірыла, Лаўрэнція і Марціна Тураўскіх (з часціцамі мошчаў), часціца мошчаў Іаана Кармянскага, выявы Божай Маці «Тураўская», «Няпіўная чара» і «Юравіцкая». Вобраз Мікалая Цудатворца на металічным лісце міраточыць. На тэрыторыі царквы ўсталявана мемарыяльная дошка ў памяць пра князя Канстанціна Астрожскага, які быў прыхільнікам праваслаўя.

Адной з галоўных славутасцяў царквы з'яўляецца двухмятровы каменны крыж X-га стагоддзя, які, паводле падання, прыплыў (супраць плыні) у Тураў з Кіева ў год Хрышчэння Русі князем Уладзімірам. Другі такі крыж пасля асвячэння кафедральнага сабора ў гонар Свяціцеляў Кірылы і Лаўрэнція Тураўскіх у 2013 годзе быў перанесены ў яго двор і ўсталяваны на спецыяльным пастаменце ў капліцы. Трэці крыж захоўваецца ў царкве Узвышэння Святога Крыжа ў вёсцы Пагост.