Туркаўская Слабада. Пакроўская царква/

У Бабруйскім раёне ў мястэчку Туркаўская Слабада пабудавана драўляная праваслаўная Пакроўская царква. Мястэчка наведаць зусім не складана, бо яно вельмі зручна размяшчаецца ў пары кіламетрах ад трасы Бабруйск–Жлобін Е–271.

       Упершыню ў гістарычных крыніцах мястэчка ўпамінаецца ў часы Вялікага Княства Літоўскага ў 1744 годзе, як Туркаўская Слабада. У тыя часы мястэчка ўваходзіла ў склад маёнтка Туркі. Гаспадарамі маёнтка былі паны Скорыны з Рэчыцкага павета.

       У часы Расійскай імперыі ў 1897 годзе налічваўся 71 двор і ўваходзіла ў склад Туркаўскай воласці Бабруйскага уезда Мінскай губерніі. У часы НЭП–а (Новая Эканамічная Палітыка) у 1926 годзе ў мястэчку была найбольшая колькасць насельніцтва каля 500 чалавек.

        У часы калектывізацыі ў 1932 годзе быў створаны мясцовы калгас «Красный Борец». У мястэчку працаваў млын. На сённяшні дзень у мястэчку налічваецца менш сотні жыхароў.

        Архітэктурнай дамінантай Туркаўскай Слабады з'яўляецца драўляная праваслаўная Пакроўская царква. Храм гэты незвычайны, бо яго будавалі стараабрадцы, якія прыйшлі на Беларусь з Расіі.

       Царква ўзведзена ў традыцыях беларускага народнага драўлянага дойлідства. Складаецца з прытвора і асноўнага аб'ёма малітоўнай залы. Над прытворам узведзена шматярусная вежа–званіца васьмярык на чацверыку. Асноўны аб'ём у плане прамавугольны і накрыты вальмавым дахам.