Свіслач. Гісторыка – краязнаўчы музей

Пісьмовая гісторыя мястэчка Свіслач пачынаецца з 13-га стагоддзя. Пра такі вялікі шлях праз стагоддзі Свіслачы можна даведацца ў раённым музеі пад назвай «Свіслацкі гісторыка – краязнаўчы музей».

Установа размяшчаецца ў дарэвалюцыйным будынку, помніку архітэктуры, які быў пабудаваны ў 1907 годзе. Спачатку тут знаходзілася яўрэйская карчма, а пасля вайны праўленне калгаса, музычная школа і гасцініца. У 1976 годзе, па рашэнні мясцовых уладаў тут пачаў працаваць гісторыка–краязнаўчы музей.

Першая зала музея пад назвай "гісторыя мястэчка горада Свіслач" прысвечана гісторыі са старажытнасці да пачатку 20 стагоддзя. Значнае месца ў гэтай экспазіцыі належыць гісторыі магнатаў Тышкевічаў, а менавіта Вікенція Тышкевіча, які вялікія сродкі ўкладваў у развіццё Свіслачы, і які быў спонсарам мясцовай мужчынскай гімназіі.

Экспануецца макет мястэчка на мяжы 18-19 стагоддзяў, калі ў Свіслачы былі Гасціны двор, гімназія, парк, звярынец, ТЭАТР і гандлёвая плошча. Асобная ўвага надаецца гімназіі і яе выбітным выпускнікам: пісьменнікам, палітыкам, гісторыкам і паэтам.

Другая зала музея прысвечана ваенным падзеям, якія непасрэдна закранулі Свіслач і раён. Тут распавядаецца пра падзеі 1812 года, Першай сусветнай вайне, Вялікай Айчыннай і іншых трагічных падзеях. Таксама прадстаўлены матэрыялы часу польскай акупацыі 1921-1939 гадоў.

Існуе пры музеі і выставачная зала, дзе экспануюцца перш за ўсё ўласныя калекцыі.