Сёмкаў Гарадок. Царква Раства Маці Божай.

   У мястэчку Сёмкаў Гарадок Мінскага раёна пабудавана каменная праваслаўная царква Раства Маці Божай. Мястэчка ўпершыню згадваецца ў 16 стагоддзі ў часы Вялікага Княства Літоўскага. У тыя часы назва мястэчка была Гарадок Саламярэцкі, і належала вядомаму беларускаму роду князёў Саламярэцкіх.

        З 1595 года знаходзіцца ў складзе маёнтка Сёмкаў Мінскага павета Мінскага ваяводства. Затым мястэчка пераходзіць да роду Стэцкевічаў, пасля таго як князёўна Алена Саламярэцкая выйшла замуж за Багдана Стэцкевіча.

       Затым маёнтак перайшоў да Адама Хмары з 1755 года. Пасля другога падзелу Рэчы Паспалітай з 1793 года мястэчка ў складзе Расійскай імперыі. У 1905-1906 гадах у мясцовым маёнтку на смалакурні працаваў паэт Янка Купала. Затым тут на ферме «Сёмкава» працаваў бухгалтарам паэт Якуб Колас у 1922 годзе.

        У 1802 годзе на грошы Адама Хмары быў узведзены каталіцкі касцёл, які ў часы Расійскай імперыі ў 1866 годзе быў перабудаваны пад праваслаўную царкву. Будынак узведзены ў стылі барока з рысамі класіцызму. У храме бралі шлюб бацькі класіка беларускай літаратуры паэта Максіма Багдановіча.

Пасля Вялікай Айчыннай вайны будынак пачаў прыходзіць у заняпад. 

       У пачатку 2000-х будынак быў перададзены праваслаўным вернікам, і быў праведзены рамонт. Цяпер тут працуе праваслаўная царква.