Ждановічы. Музей-дача Васіля Быкава.

Адметнасць музея - яго сапраўднасць і захаваная абстаноўка, якая была тут пры жыцці пісьменніка. 

У будынку дачы можна наведаць кухню, гасціную і гараж. На другім паверсе-балюстрада, кабінет і спальня Васіля Уладзіміравіча, а таксама мансарда. Інтэр'ер захаваў дух 1980-1990 - х гадоў: сціплая мэбля, абедзенны гарнітур, буфет і сцены, абабітыя вагонкай.

Тут усё засталося так, як было пры жыцці пісьменніка. У кабінеце стаіць лямпа, друкаваная машынка і кававы кубак, у мансардзе — фарбы і пэндзля, а на крэсле вісіць пінжак, нібы гаспадар вось-вось вернецца.

Яшчэ ў 1993 годзе сам Васіль Быкаў перадаў музею больш за 1000 каштоўных экспанатаў. У 2012 годзе яго ўдава, Ірына Міхайлаўна, дапоўніла калекцыю рэчамі з лецішча і з менскай кватэры пісьменніка, што склала больш за 1600 прадметаў.

Наведвальнікі могуць адчуць атмасферу гэтага значнага для беларусаў месца, дакрануцца да бяроз, якія памятаюць Быкава.

Штогод 19 і 22 чэрвеня, у дні нараджэння і смерці пісьменніка, у музеі праводзяцца «быкаўскія дні», якія сталі традыцыяй ушанавання яго памяці.

Музей адкрыты з мая па верасень.

Гэта выдатны музей у маляўнічым месцы! Ён захоўвае гістарычную спадчыну.  Тут любы можа дакрануцца да побыце вялікага пісьменніка і даведацца шмат цікавага і пазнавальнага!