Мінск. Жаночы манастыр базыльянаў.

    У гістарычным цэнтры Менска каля плошчы Свабоды знаходзіцца будынак кляштара базыльянак Святога Духа. Манастыр заснаваны ў 1641 годзе на Верхнiм рынку. Сродкі на святыню даў уніяцкі Мітрапаліт Антоній Сялява. Ахвяравала грошы на манастыр 9 тысяч злотых і першая ігумення Кацярына Сапега.

           Спачатку манастыр размяшчаўся ў жылых дамах на рынку, якія выкупілі ў жыхароў, а манастырскі корпус ўзвялі да 1650 годзе. Пры будаўніцтве былі выкарыстаныя падвалы і сцены старых будынкаў. П-падобны ў плане, мураваны і двухпавярховы манастырскі будынак меў вальмавы дах і быў накрыты чарапіцай. У інтэр'еры, акрамя манастырскіх келляў, былі кухня, трапезная, пакоі для гасцей і іншыя памяшканні.

         Побач быў узведзены корпус мужчынскага манастыра базыльян, дзе ў часы Расійскай імперыі працавала мужчынская гімназія. І каля манастыра ўзведзена ўніяцкая царква Святога Духа, якую знеслі ў савецкія часы і адбудавалі некалькі гадоў таму каля Ратушы.

       Пасля падзелу Рэчы Паспалітай манастыр базыльянак у 1795 годзе ў часы Расійскай імперыі быў зачынены. Будынак перадалі праваслаўнаму Петрапаўлаўскаму манастыру. З 1799 года будынак заняў праваслаўная кансісторыя. Затым манастырскі комплекс перадалі Петрапаўлаўскаму праваслаўнаму сабору.

      Пасля рэвалюцыі ў манастыры былі жылыя кватэры. У 1995 годзе прайшла рэстаўрацыя будынка, і цяпер тут працуе дзіцячая музычная школа імя кампазітара Яўгена Глебава.