Мінск. Тэатр Янкі Купалы.

Гарадскі тэатр у Мінску будаваўся па ініцыятыве мінскага губернатара князя М. Трубяцкога, паколькі ў 1887 годзе здарыўся пажар у былым будынку тэатра. Паводле рашэнне гарадской Думы было вырашана ўзвесці новы будынак тэатра, для якога было абрана прыгожае месца ў цэнтры горада каля Аляксандраўскага сквера. Архітэктарамі новага тэатра сталі Канстанцін Увядзенскі і Караль Казлоўскі. У чэрвені 1888 года адбылася урачыстая закладка будынка на якой прысутнічалі Вялікі князь Уладзімір Аляксандравіч і Вялікая княгіня Марыя Паўлаўна, якія палажылі на месца падмурка некалькі залатых манет і заклалі першыя цагліны. Святар Петрапаўлаўскай царквы адслужыў малебен. З тых часоў на сцэне тэатра выступалі лепшыя маскоўскія і пецярбургскія трупы і выдатныя артысты, сярод якіх Вера Камісаржэўская. У 1917 годзе Першае беларускае таварыства драмы і камедыі, якое стварыў рэжысёр Фларыян Ждановіч, паставілі п’есу “Паўлінку” Янкі Купалы. А ў снежні 1917 года у тэатры адбыўся  Першы Усебеларускі з’езд. Праз некалькі год тут пачаў працавацць Беларускі дзяржаўны тэатр аснову якога склалі таленавітыя акторы: Стэфанія Станюта, Канстанцін Саннікаў, Яўсцігней МІровіч і многія іншыя. У пасляваенныя гады будынак быў перабудаваны, страціўшы свае першапачатковыя рысы. З 2010 па 2013 гады ішла рэканструкцыя тэатра. Адбыліся змены вонкавага выгляду тэатра і яго інтэр’ераў. Быў вернуты першапачатковы дэкор і мадэрнізаваны тэхнічныя магчымасці сцэны.