Малыя Шарыпы. Чырвоная царква

У Магілёўскай вобласці, на жаль, не так шмат захавалася помнікаў архітэктуры. І некаторыя з іх цяпер знаходзяцца ў запушчаным стане. Але нават у руінах ёсць нейкая прыгажосць. Адным з такіх прыгожых і таямнічых храмаў з'яўляецца праваслаўная царква ў невялікай вёсцы Малыя Шарыпы.

Каб туды трапіць, вам трэба прыехаць у мястэчка Сава, што на трасе Орша – горкі. Затым праехаць каля трох кіламетраў да вёскі Малыя Шарыпы.

У саміх Шарыпах сярод зараснікаў дрэў Вы ўбачыце руіны высокай званіцы, якая дамінуе над наваколлем. Мясцовыя жыхары называюць гэты праваслаўны храм Чырвонай царквой. З цягам часу сапраўдная назва царквы згубілася і засталася народная-Чырвоная царква. Так храм называюць, мабыць таму, што царква пабудавана з чырвонай цэглы. Па ўспамінах старажылаў, царкву пабудавалі да 1913 годзе ў гонар 300–годдзя дынастыі Раманавых. Будынак будаваўся ў псеўда-рускім стылі па тыпавым праекце. У савецкія часы царква была зачынена і тут абсталявалі складское памяшканне.

Царква складаецца з некалькіх асноўных частак: Званіца, бабінец, малітоўная зала і паўкруглая апсіда. Званіца была шмат'ярусная. Будынак аздоблены дэкорам з чырвонай цэглы.

Каля царквы ёсць парковачнае месца. Калі будзеце ехаць праз мястэчка Сава, то можаце ўбачыць каля мясцовай школы помнік беларускаму паэту Васілю кавалю (1907-1937), які нарадзіўся ў гэтым мястэчку.