Лявонпаль. Траецкая царква

Спачатку мястэчка Лявонпаль у Міёрскім раёне называлася… Чурылавічы і была пераіменавана ў гонар свайго ўладальніка Леона Лапацінскага. Яго сын Мікалай Тадэвуш пабудаваў тут палац з маёнткам і спачатку меркавалася, што гэта будзе летняя рэзідэнцыя. А атрымалася так, што гэта стала галоўнай фамільнай сядзібай і сюды быў перавезены сямейны архіў і калекцыя карцін.

У 1782 годзе па фундацыі Лапацінскіх у Лявонпалі быў пабудаваны храм, які належыў уніятам. Царква была драўляная з двумя вежамі, якія былі чацверыковыя, накрыты чатырохскатным шпілем. Пры ўваходзе ў храм зроблены казырок на чатырох слупах.

Пасля забароны ўніяцтва на нашых землях у 1839 годзе, уніятаў пачалі пераводзіць у праваслаўную веру. Некаторыя не хацелі пераходзіць у праваслаў'е і ўзнікалі канфліктныя сітуацыі. Такая ж гісторыя адбылася і ў Лявонпалі. У 1841 годзе мясцовыя сяляне адмовіліся пераходзіць у праваслаў'е і па выкліку мясцовага праваслаўнага святара ў Лявонпаль прыбыў атрад салдат для ўсмірэння непакорных уніятаў. Пасля гэтага лакальнага бунта Траецкую царкву перадалі ў веданне праваслаўнай царквы.

Пасля таго як храм перайшоў да праваслаўных будынак быў перабудаваны. Дзве вежы з фасада разабралі і ўсталявалі светлавы барабан з цыбулінай. Царква лічыцца помнікам архітэктуры народнага дойлідства з рысамі барока. У інтэр'еры захавалася скульптура 18 стагоддзя і абразы 18 – 19 стагоддзяў.