Каралішчавічы. Касцёл Апекі Божай Маці.

     У мястэчку Каралішчавічы Мінскага раёна захаваўся старадаўні драўляны касцёл апекі Божай Маці. Каралішчавічы знаходзяцца каля Мінска на МКАД-2 у напрамку Гомеля, і таму дабрацца сюды вельмі лёгка.

      Упершыню мястэчка згадваецца ў 16 стагоддзі ў часы Вялікага Княства Літоўскага, калі ўваходзіла ў склад Мінскага павета Мінскага ваяводства. У дакументах 1582 года з'яўляецца часткай маёнтка Гатава і належала ю.Масальскаму і П. Крышынскаму. У 1597 годзе належала Тышкевічу, Масальскаму і Крушынскаму. У 1667 годзе маёнтак належыць князю Ф.Друцкаму–Горскаму.

        У 1778 годзе ў Каралішчавічах меліся дзве сырабойні, фальварак і касцёл. У тыя часы гэта была маёмасць I. Прушынскага.

      Каталіцкі драўляны касцёл пабудаваны ў часы Вялікага Княства Літоўскага ў 1785 годзе за сродкі Станіслава Прушынскага. У наступныя гады храм рамантавалі і даглядалі прадстаўнікі роду Прушынскіх.

         У касцёле, хутчэй за ўсё, была ахрышчана Ганна Цюндзявіцкая з роду Прушынскіх (1803-1850) - пісьменніца, аўтар папулярных кніг па вядзенні гаспадаркі, і ў тым ліку кнігі «Літоўская гаспадыня». Тут хрысцілі і вядомага беларускага паэта Язэпа Пушчу (1902-1964).

        Ёсць версія, што ў 1873 годзе ў касцёле бралі шлюб польскі і рускі мастак Генрых Семірадскі і Марыя Прушынская. У 1860-х гадах у касцёле бываў вядомы беларускі і польскі кампазітар Станіслаў Манюшка.

      Пасля рэвалюцыі ў савецкія часы касцёл зачынілі і перабудавалі будынак пад клуб. Зусім нядаўна будынак перадалі каталіцкім вернікам, і ў 2014 годзе тут прайшла першая служба.

       Касцёл драўляны прамавугольны ў плане будынак. Фасад бязвежавы. Да рэвалюцыі была над фасадам адна невялікая шматгранная вежачка.