Казімірава. Касцёл Святога Юзафа Рамесніка.

У мястэчку Казімірава Асіповіцкага раёна на мясцовых магілках пабудаваны драўляны каталіцкі касцёл. Храм асвечаны ў гонар Святога Юзафа. У часы Расійскай імперыі ў 1862 годзе гаспадар маёнтка ў Казімірава Ян Аляхновіч прасіў дазвол на ўсвядзенне каталіцкай капліцы на мясцовых магілках у Казімірава. У капліцы планавалась чатыры разы на год праводзіць службу за супакой памерлых.

         Але Аляхновічу адмовілі па некалькіх прычынах. Колькасць каталікоў у мястэчку была невялікая, і побач у суседных мястэчках былі праваслаўныя цэрквы. Недалёка знаходзіўся касцел, напрыклад у Бабруйску і ў Свіслачы. І пан Аляхновіч на той час быў маладым і здаровым чалавекам, і яму зусім не складана было паехаць у іншы касцел.

       У пачатку 20-га стагоддзя ў 1900 годзе была заснавана парафія. Каталіцкi касцел пабудавалі ў 1905 - 1906 гадах. На падмурку будынка ёсць памятныя надпісы з датай пабудовы 1906 год. У касцеле быў арган.

У часы Савецкага Саюза храм зачынілі на кароткі час, і прыстасавалi пад зернесховішча. Але людзі прыходзілі ўсё роўна да касцела на службу. Ішлі з абразамі і з харугвамі.

       На сеннняшні час свайго ксяндза ў касцеле няма, і сюды прыязжае на вялікія каталіцкія святы манах-францысканец.

      Помнік узведзены ў стылі народнага дойлідства. Асноўны аб'ем у плане мае прамавугольную форму. Складаецца будынак з двух архітэктурных частак: малой залы і апсіды. Накрыты двухсхільным дахам, а над апсідай вальмавы дах. Галоўны фасад завершаны трохвугольным франтонам. Над фасадам надбудавана невялікая двух'ярусная чацверыковая вежачка.