Гродна. Дом Лапінера (вул. Замкавая, 12).

      У горадзе Гродна на Замкавай вуліцы (дом нумар 12) ёсць помнік архітэктуры, які называюць домам Лапінера. Будынак узведзены ў часы Расійскай імперыі ў 1880 годзе. За час свайго існавання некалькі разоў перабудоўваўся.

         Некаторыя гісторыкі лічаць, што гэта самая старая жылая пабудова ў горадзе і што ніжні ярус левай частцы дома быў узведзены значна раней у часы Вялікага Княства Літоўскага ў 15 – 16 стагоддзях. І гэтаму ёсць аб'ектыўнае тлумачэнне: адзін з падвалаў зроблены з шырокапамернай цэглы, аналагаў якой у Гродне больш нідзе няма. З падобнай цэглы зроблены сцены Мірскага замка і вежаў замка ў Навагрудку.

      У 1910 годзе ў доме Лапінера па Замкавай вуліцы была кватэра Бажанава, які быў прысяжным павераным. Размяшчалася Агенцтва страхавання рускага страхавога таварыства. У часы Польскай дзяржавы ў 1925 годзе працавала крама «Каплан, Бурдзе, Шапіра», дзе прадавалі каланіяльныя тавары.

      Пасля Вялікай Айчыннай вайны ў будынку размяшчалася абутковая фабрыка № 2. Затым працавала школа ФЗО абутнікаў. Зараз у будынку жылыя кватэры.