Гродна. Дом Анцылевіча (вул. Замкавая, 17).

У горадзе Гродна каля каралеўскага замка, на скрыжаванні вуліц Замкавай і Давіда Гарадзенскага (па адрасе вул.Замкавая, 17), знаходзіцца Дом Анцылевіча. Будынак мае статус гісторыка-культурнай каштоўнасці. Узведзены дом у часы Расійскай імперыі ў 1912 годзе, і належаў саветніку Анцылевічу. Будынак узведзены на тым месцы, дзе быў флігель каралеўскай стайні часоў Вялікага Княства Літоўскага і Рэчы Паспалітай, бо побач знаходзяцца два Каралеўскія замкі.

Будынак мураваны, атынкаваны і двухпавярховы. Пабудаваны з цэглы. Мае ў плане прамавугольнік з унутраным дваром. Ёсць карніз і паміж паверхамі дэкаратыўны пояс. Старажытныя балконы не захаваліся, і зроблены новыя, якія стылізаваныя пад даўніну.

Пасля Вялікай Айчыннай вайны ў будынку працавала пажарная ахова Міністэрства ўнутраных спраў і добраахвотнае пажарнае таварыства. На дадзены момант тут размяшчаюцца толькі жылыя кватэры.