Гродна. Дом Борэра (вуліца Карла Маркса, 10).

У горадзе Гродна ў гістарычным цэнтры па вуліцы Карла Маркса (дом нумар 10) знаходзіцца Дом Борэра. Гэта невялікі будынак, які знаходзіцца паміж двума вялізнымі каталіцкімі культавымі пабудовамі: Касцёлам Францішка Ксаверыя ордэна езуітаў і кляштарам брыгітак. Помнік узведзены ў другой палове 19-га стагоддзя ў часы Расійскай імперыі.

        У тыя часы вуліца называлася не Карла Маркса, а насіла назву купецкая. На вуліцы размяшчаліся не толькі значныя культавыя пабудовы, Палацы і асабнякі магнатаў і шляхты, але і дамы гандляроў і купцоў, крамы рамеснікаў.

         Дом каменны, зроблены з цэглы, двухпавярховы з аднапавярховай прыбудовай. Абтынкаваны. Значная частка дэкаратыўнага аздаблення параднага фасада гэтага дома была страчана падчас капітальнага рамонту. У цэнтры будынка маецца балкон. З левага боку арачны праезд.

         Помнік некаторы час быў уласнасцю Хіршы Борэра. Потым гаспадаром быў Прусак, і іншыя ўладальнікі. У 1911 годзе тут была жылая кватэра лекара Шмуіла Кагана.

       Пасля Вялікай Айчыннай вайны ў будынку працаваў пнеўматычны цір. З 1986 года размяшчалася крама, дзе прадавалі матэрыялы для тэхнічнай творчасці «Зрабі сам».

        Зараз у будынку працуе Ўзбекская чайхана і сушы–бар «Тунец».